Autori i librit “Terrori i Serbisë pushtuese mbi shqiptarët”, Nusret Pllana, ka reaguar pasi përsëri u përmend libri i tij pas vazhdimit të diskutimeve në mes të palës kosovare dhe asaj serbe sa i përket dialogut në Bruksel.
Zëvendskryeministri, Besnik Bislimi, tregoi që pala serbe sërish i është referuar këtij libri, duke thënë se aty përmendet që Ushtria Çlirimtare e Kosovës ka arkivë dhe se ajo arkivë duhet të hapet.
Pllana në një intervistë për Gazetën Infokus ka deklaruar edhe një herë se libri i tij nuk është bazuar në asnjë arkivë dhe se UÇK-ja nuk ka arkivë.
Po që sipas tij vetë ky libër është arkivë në vete.
“Edhe ata me u marrë pastaj me këtë libër dhe me detajet e tij. Ky libër s’ka vend në botë që nuk është promovuar dhe për këtë arsye i dhemb Serbisë, se aty i sheh krimet që i ka bërë dhe nuk din gjë tjetër vetëm të thotë arkivi i UÇK-së”, tha Pllana.
Vetëm në fletën e parë prej krejt atyre përmendet Arkivi shtetëror i Kosovës- sektori i arkivit të UÇK-së, e arkiva i UÇK-së është vetë libri. Po libri është sektor pjesë e arkivit të UÇK-së, se UÇK-ja s’ka pasë arkivë me plot kuptimin e fjalës”, ka thënë Pllana.
Ai po ashtu ka kërkuar dhe i ka spjeguar qeverisë aktuale, se është gabim dhe nuk duhet të tregohen inferior përballë Serbisë, kur dihet se kush është viktima.
“Këta po e keqinterpretojnë. Librin tim duhet me e pasë çdo shtëpi, një shtëpi shqiptare që nuk e ka këtë libër nuk ka ku me shku. Behanja e institucioneve tona është që se ka marrë këtë libër me e institucionalizu, me e ba libër shtetëror. Këta nuk duhet me e ndi vetën inferior kur ulen përballë tyre, sepse si të ulën, këta duhet me ditë që përballë e kanë agresorin dhe vetë janë viktima, kështu që nuk duhet bërë kësi analiza dhe krahasime me Serbinë, se ata janë ekspertë të dinakërisë e të mashtrimeve”, ka thënë ai.
Ai ka shtuar se çdo faqe e librit të tij është e vulosur me vulën e gjakut.
“Ato janë gjëra të cilat unë i kam përjetuar të gjitha, janë dëshmi e vulës, çdo faqe e atij libri është me vulë të gjakut, me emër dhe mbiemër, e pikërisht këtu iu dhemb këtyre, se tash mundohen me i përmend jo arkivat e UÇK-së, jo arkivat e Serbisë”, ka shtuar ai.
Kujtojmë se sot në lidhje me këtë ka reaguar edhe u.d e shefit të Grupit Parlamentar të LVV-së Mimoza Kusari – Lila, e cila akuzoi opozitën se vetë kanë pranuar që ekziston arkivi i UÇK-së./Gazeta Infokus/