Viktimat e përmbytjeve në Shtetin Meksikan të Hidalgos, njerëzit e mbajtur peng jashtë vendit të tyre dhe 175-vjetori i dukjeve të Zojës në La Salette, ishin në qendër të fjalëve të Papës Françesku, pas lutjes së Engjëllit të Tënzot.
Pas lutjes mariane, mendimi i Papës shkoi tek viktimat e përmbytjeve në Shtetin Hidalgo të Meksikës. Papa, në përfundim të Engjëllit, kujtoi posaçërisht të sëmurët e vdekur dy javë më parë, në një spital. Tragjedia ndodhi pas vërshimit të lumit Tula, si pasojë e shirave të rrëmbyera. Përmbytja e spitalit dhe ndërprerja e energjisë elektrike shkaktuan shuarjen e makinerive për shpëtimin e jetës.
Papa u lut edhe për njerëzit e mbajtur padrejtësisht në vende të huaja, duke siguruar se lutet për ta:
“Dëshiroj t’i siguroj për lutjen time njerëzit, që mbahen padrejtësish në vende të huaja: për fat të keq ka raste të ndryshme e, nganjëherë, edhe të ndërlikuara. Uroj që, pasi të jetë kryer detyra e drejtësisë, këta njerëz të mund të rikthehen në atdhe”.
175-vjetori i dukjeve të Zojës në La Salette
Mendimi i Françeskut shkoi edhe tek njerëzit, që u mblodhën në Shenjtëroren e La Salette, në Francë, për të kujtuar 175-vjetorin e çastit, kur Maria iu duk me lot në sy dy fëmijëve:
“Lotët e Marisë na kujtojnë ata të Jezusit mbi Jeruzalemin e ankthin e Tij në Gjetseman; janë pasqyrim i dhimbjes së Krishtit për mëkatet tona e thirrje, gjithnjë aktuale, për t’ia besuar vetveten mëshirës së Tënzot”./Radio Vatikani