Përfaqësuesi i Shteteve të Bashkuara të Amerikës (SHBA) në seancën e sotme të Këshillit të Sigurimit ka thënë se SHBA pret që dialogu mes Serbisë dhe Kosovës të fillojë sa më shpejtë, shkruan Gazeta Metro.
Në fjalimin e tij në Këshillin e Sigurimit, përfaqësuesi i SHBA’së, ka folur për procesin e dialogut ku tha se nuk ka kohë për të humbur.
“SHBA’të presin që të punojnë me Kurtin e Osmanin në shumë prioritete të përbashkëta, duke filluar nga luftimi i korrupsionit, reformat dhe normalizimi i marrëdhënieve me Serbinë. Me qeverinë e re të Kosovës ne mirëpresim planet e emisarit të BE’së që dialogut të rinis në të ardhmen e afërt. Zotimet e dhëna nga Kosova dhe Serbia në shtator të vitit 2020 kanë përforcuar nivelin e bashkëpunimit ekonomik. Ne besojmë që ka bazë të mirë, dhe shumë pak kohë për të humbur”, tha ai.
Përfaqësuesi amerikan ka bërë thirrje që të dy palët të zbatojnë marrëveshjet e arritura më herët.
Tutje ai ka thënë se misioni i UNMIK’ut në Kosovë duhet të përmbyllet.
“Ne thërrasim për zbatimin e marrëveshjeve të kaluara. SHBA’të duan të ritheksojnë qëndrimin e vet se UNMIK’u duhet të ecë drejt përmbylljes. Ne ftojmë që t’i jepet fund UNMIK’ut. Dua të përgëzoj Kosovën dhe Izraelin për vendosjen e marrëdhënieve diplomatike”, tha përfaqësuesi amerikan në Këshillin e Sigurimit. /gazetametro.net