Sapo është mbyllur ndeshja finale e Ligës së Konferencës në stadiumin Air Albania. Roma ka fituar me rezultatin e ngushtë 1 me 0, me një gol të shënuar nga Nikolo Zaniolo.
Roma e Jose Mourinhos mposhti në finalen e Ligës së Konferencës, Feyenoordin me rezultatin 1-0, duke siguruar kështu trofeun e parë të ligës më të re europiane.
Nikolo Zaniolo shënoi golin e avantazhit për Romën. Goli i italianit nuk u festua vetëm në Tiranë, por edhe në “Olimpico” të Romës ku ishin mbledhur tifozët verdhekuq që nuk patën mundësi të udhëtonin drejt Shqipërisë.
Goli i Nikolo Zaniolos, në minutën e 32-të, i dhuroi këtë sukses të artë kryeqytetasve, të cilët kishin pritur më shumë se 60 vite, për të provuar shijen e një trofeu Eeuropian për klube. Edhe pse holandezët, bënë gjithçka në pjesën e dytë, për të barazuar sfidën, fati nuk ishte me ta, edhe pse goditën 2 herë shtyllën. Në fund, festa e çmendur e italianëve nisi sapo ra bilbili që lajmëroi fundin e ndeshjes.