Jubileu i artë i pranisë së Motrave françeskane të Zojës së Papëryeme në Tuz u kremtua në një atmosferë falënderimi e mirënjohjeje, duke kujtuar veprat e mira që Zoti i ka bërë gjatë këtyre 50 viteve përmes shërbimit të motrave në bashkëpunim e fretnit.
50-vjetori i misionit tё Motrave françeskane të Zojës së Papërlyeme nё mesin e popullit tё Zotit nё famullinё kishtare tё Tuzit nё Mal tё Zi. Njё jubile kremtuar me mirёnjohje ndaj Zotit pёr tё mirat e bekimet e panumërta, me njё vetëdije tё pёrtёrirё se tё punosh nё vreshtёn e Zotit, do tё thotё tё dëshmosh, çdo ditё, praninë e Zotit në çdo kohë e realitet, edhe në kohët e realitetet tona. E ky është shërbim i çmuar që i bëjnë Kishës motrat rregulltare, ato janë roje që shquajnë nga larg dhe kumtojnë dashurinё e Zotit ndaj çdo njeriu, e cila tashmë është e pranishme në histori.
Motrat Françeskane të Zojës së Papërlyeme e kryejnë misionin e tyre apostolik, duke iu kushtuar plotësisht Krishtit e duke u shërbyer njerëzve në emër dhe për dashuri të Tij. Se ç’vlerë ka misioni i tyre, jeta e tyre e dhuruar, mjafton të kujtojmë rregulltaren e madhe, Shenjten Nënë Terezë, që na kujton se misioni i të krishterëve ёshtë tё përhapin Dritën e Krishtit: “Të krishterët janë dritë për njeri-tjetrin dhe për mbarë botën”.
Të shtunën, me 20 nëntor, Motrat françeskane të Zojës së Papërlyeme të Malit të Zi, kremtuan 50 vjetorin e pranisë së tyre ne Tuz. Ky jubile i artë u kremtua në atmosferë falënderimi e mirënjohjeje duke kujtuar veprat e mira që Zoti i ka bërë gjatë këtyre 50 viteve përmes shërbimit të motrave në bashkëpunim e fretnit në Tuz.
Festa filloi me Meshë solemne, drejtuar nga arqipeshkvi i Tivarit, imzot Rrok Gjonlleshaj, në bashkëmeshim me vikarin e përgjithshëm arqipeshkvisë të Tivarit dom Simo Lulaj, provincialin e Fretënve të provinces Shqiptare e të Malit të Zi, at Pashko Gojçajn, guardianin e kuvendit dhe famullitarin e Tuzit at Mirash Marinaj e meshtarë tjerë françeskanë në pjesëmarrje në nji numri të bukur të motrave Françeskane dhe të besimtarëve tjerë.
Imzot Gjonlleshaj me këtë rast falënderoi motrat për praninë dhe shërbimin e tyre në këtë famulli dhe theksoi rëndësinë e bashkëpunimit të fretënve me motrat në nder e lavd Zotit e për shëlbimin e shpirtnave të besimtarëve.
Ndërkaq, p. Pashku duke përmendi përvojën e tij 40 vjeçare me motrat françeskane, për çka, siç tha ai, kam arsye të dëshmoj shumë për këtë hir që ma ka dhuruar Zoti, qysh nga ditët e formimit rregulltar e meshtarak. Por, në kontekstin e festës, lidhur me veprimtarinë e motrave, ai u shpreh mirënjohes ndaj eproreve për dërgimin e motrave, para 50 vitesh e deri me sot dhe i shpreh falënderues ndaj secilës moter që ka shërbyer në Tuz për kontributin si në jetën në këtë kuvend si familje françeskane, poashtu edhe në veprimtarinë e baritore, me të cilën lanë gjurmë të thellë e vulë të pashlyeshme.
Fushat e veprimtarisë së motrave ai i përmblodhi duke i përshkruar si 5 vula kryesore: 1. Në përforcimin e fesë; 2. Në rritjen e dashtnisë ndaj atdheut; 3. në Formimin e ndërgjegjes kristjane; 4. Në ndryshimin e mentalitetit në veshtrimin pozitiv; 5. Në ngritjen e kulturës evropiane.
Ndërkaq, motёr Lidia, provinciale e Motrave Françeskane falënderoi Hyjin, siç tha edhe vet: “... për ftesën frymëzuese të vëllezërve Françeskanë dhe për pranimin vendimtar nga ana e motrave të kësaj ftese në shërbim të besimtarëve”. Kjo Provincë, atëbotë e re në udhëtim, por e pasur në fe dhe e guximshme për shërbim, vendosi t’i dërgojë motrat që të jetësojnë karizmën e Themelueses tonë dhe atë françeskane në Malësi të Madhe ku tashmë ishte e gjallë dhe e njohur nga dëshmia e fretërve.
Provincialja, poashtu kujtoi se jemi në shënimin 75 vjetorit të ardhjes së Motrave tona nga Sllovenia në Mal të Zi, e pra kremtojmë edhe në kontesktin e vitit jubilar të kushtuar shën Jozefit, pajtor i Kishës dhe i Kongregatës sonë. E gjithë kjo – theksoi motёr Lidia - e bën më madhështor këto Jubile pasi që çdo gjë që bëjmë në lavd të Hyjit, është gjithmonë e rrënjosur në zemrën e Kishës.
Në vazhdim, ajo u përpoq t’i përfshijë karakteristikat e përbashkëta të shërbimit të motrave. Ishte shërbim në heshtje, dhurim në punë të thjeshta të padukshme, shërbime që ka mundur ti shoh vetëm Zoti, jetë në lutje e dhuruar për të tjerët, dëshmi thjeshtësie e jetuar me sakrificë pa shumë fjalë, duke aluduar në rrethanat shoqëroro-politike ku Kisha nuk ka pasur mundësi të veprojë në liri të plotë. E me kalimin e kohës, shërbimi dhe veprimtaria e motrave zgjerohej. Në kuadër të misionit në Tuz ato shërbyen edhe në Triesh, Sukruqë e Traboin.
Motrat u bënë bashkëpuntore të zellshme në katekizim të fëmijëve të të gjitha moshave, në punën e zyrës famullitare, botimin e revistës ‘Zani i Shna Ndout’; ato udhëheqin korin, marrin pjesë dhe bashkëveprojnë në organizime të ndryshme fetare dhe kulturore si udha e kryqit, pjesëmarrje në karnevale, pjesë teatrale, organizojnë takime me të rinj dhe prindër, bashkëndajnë shërbimin katekistik me laikët, ftesë kjo edhe e Papa Françeskut në udhëtimin e Ecjes Sinodale. Me shume mirënjohje përmendi se kuvendi i fretërve ishte një bashkësi formimi për shumë gjenerata të kandidateve që kanë jetuar dhe janë shkolluar në Tuz.
Për këtë faleminderit të gjithë fretërve, që tashma gëzojnë amshimin, si: p. Gjergji, p. Kola, Vinko, p. Deda dhe p. Zefi, Murgesha m. Amadeja, dhe fretërve që po festojnë me në krye me p. Pashkun. E mbi të gjitha ajo e falënderoi Hyjin për jetën e secilës motër, që në Provaninë e Hyjit kanë jetuar dhe dëshmuar thirrjen dhe dërgimin e tyre rregulltar.
Pas meshës, kremtimi përfundoi me një program të pasur fetaro-kulturor përgatitur nga motrat me korin, animatorët dhe besimtarët tjerë të famullisë.
Motër Olga Dulaj
/Radio Vatikani