E zgjedhur nga Kapitulli i përgjithshëm i Kalkutës, zë vendin e motër Premës, e cila u printe motrave që nga viti 2009. E rritur në Kalkutë, pranë Nënë Terezës, 68 vjeçare, deri tani ishte eprore për Keralanë.
Indiania motër Joseph Michael, 68 vjeçare, është eprorja e re e Misionareve të Bamirësisë, motrat e Nënë Terezës. U zgjodh nga Kapitulli i përgjithshëm i motrave, mbledhur në Shtëpinë nënë të Kalkutës. Zë vendin e motër Premës, me origjinë gjermane, e cila u priu për dy mandate motrave, që nga viti 2009.
Motër Joseph bëhet kështu rregulltarja e katërt e thirrur për t’u prirë motrave me sarin bardh e blu, i njohur në mbarë botën për shërbimin që u bën të varfërve ndër më të varfër. Pas Shën Nënë Terezës, themeluese e Misionareve të Bamirësisë, që ndërroi jetë në vitin 1997, për të drejtuar kongregatën u thirr motra nepaleze Nirmala Joshi, e cila themeloi edhe degën kundruese të motrave.
Motër Joseph është indianja e parë që i besohet detyra e eprores së përgjithshme. Me origjinë nga Thissur, në Jerala, hyri në radhët e Motrave të Bamirësisë kur ishte vetëm 20 vjeçare. E u bë menjëherë një nga bashkëpunëtoret më të ngushta të Nënë Terezës. E kreu misionin e saj edhe në Filipine e, më pas, në Poloni e në Papua Guinea e Re.
Aktualisht jetonte në Shishu Bhavan (Shtëpia e pritjes e fëmijëve) të Ernakulam, ku ishte eprore e Misionareve të Bamirësisë për Keralanë. Deri 15 muaj më parë ishte asistente e përgjithshme, përkrah Motër Premës. Nga Ernakulam, motra John Mariette e komenton kështu, në Asia News, këtë zgjedhje: “Jam e sigurt se Zoti do t’i përdorë të gjitha talentet dhe cilësitë e saj, për t’i bërë mirë shoqërisë, sipas planeve të Tij”.
Në kapitullin e Misionareve të Bamirësisë – që zgjodhën edhe Këshillin e Përgjithshëm në ndihmë të Eprores Joseph – morën pjesë edhe përfaqësues të të gjitha bashkësive të Urdhrit, sot i pranishëm në 110 vende të botës. (radio vatikani)