12 qershori shënon 27-vjetorin e çlirimit të Kosovës, një nga momentet më vendimtare në historinë moderne të rajonit, që i dha fund luftës dhe hapi rrugën për paqe dhe administrim ndërkombëtar.
Më 12 qershor 1999, trupat paqeruajtëse të NATO-s, të njohura si KFOR, hynë në Kosovë pas 78 ditësh bombardimesh ajrore kundër forcave serbe, një operacion i udhëhequr nga Shtetet e Bashkuara. Ky moment përfaqësoi jo vetëm fundin e një konflikti të përgjakshëm, por edhe një kthesë të rëndësishme për sigurinë ndërkombëtare.
Por hyrja e trupave të NATO-s u shoqërua me tensione të forta gjeopolitike. Vetëm një ditë më parë, forcat ruse kishin marrë nën kontroll në mënyrë të papritur Aeroportin e Prishtinës, në një lëvizje që u interpretua si përpjekje për të ndarë Kosovën dhe për të sfiduar praninë perëndimore.
Situata u tensionua në maksimum, kur trupat britanike dhe norvegjeze u gjendën përballë ushtarëve rusë, duke ngritur alarmin për një përplasje të mundshme mes fuqive të mëdha. Në atë kohë, shumë analistë e konsideruan këtë moment si një nga rastet më të afërta me një përshkallëzim që mund të çonte deri në një konflikt global.
Pas ndërhyrjes diplomatike të Shteteve të Bashkuara dhe Britanisë së Madhe, kriza u menaxhua dhe Moska e tërhoqi qëndrimin, duke i hapur rrugë vendosjes së plotë të misionit të NATO-s në Kosovë.
Hyrja e KFOR-it bëri të mundur kthimin në shtëpitë e tyre të mbi një milion shqiptarëve të dëbuar gjatë luftës, duke nisur një proces të gjatë stabilizimi dhe rindërtimi.
Në afro tri dekada, rreth 500 mijë trupa nga vende të ndryshme kanë shërbyer në Kosovë në kuadër të misionit paqeruajtës, duke kontribuar në sigurinë dhe ndërtimin e institucioneve.
Sot, 12 qershori mbetet simbol i lirisë dhe sakrificës, një ditë që shënoi fundin e një epoke të errët dhe fillimin e rrugëtimit të Kosovës drejt integrimit euroatlantik./public.al