Shumica e shteteve anëtare të Bashkimit Evropian janë në favor të heqjes së masave ndaj Kosovës, merret vesh nga burimet diplomatike në Bruksel.
I vetmi dallim në qëndrime, siç pohojnë burimet e RTK-së, ka të bëjë me mënyrën si të shkohet drejt heqjes së sanksioneve, të cilat Brukseli ia vendosi Kosovës në qershor të vitit të kaluar pas eskalimit të dhunës në veri, si rezultat i marrjes së detyrës së kryetarëve shqiptarë në katër komunat.
Të martën, më 22 prill, është mbajtur takimi i ambasadorëve të shteteve anëtare të BE-së, ku për herë të parë është diskutuar mundësia e heqjes së masave në dritë të mbajtjes së zgjedhjeve, më 21 prill në veri të Kosovës.
Në këtë takim të ambasadorëve ka marrë pjesë edhe Miroslav Lajçak, emisari evropian për dialog si dhe Tomas Szoyong, shefi i zyrës së BE-së në Prishtinë.
Siç merret vesh nga burimet mirë të informuara nga ky takim, shtetet anëtare të BE-së janë të ndara në dy grupe: ato që konsiderojnë së masat duhet të hiqen menjëherë, dhe grupi tjetër i shteteve të cilat janë të mendimit se masat duhet të hiqen gradualisht, nëse Kosova vazhdon të tregojë përpjekje për të de-përshkallëzuar situatën. Në grupin e dytë, sipas burimeve të RTK-së, bëjnë pjesë shtetet më të fuqishme të BE-së, siç janë Gjermania Franca e Italia të cilat gjithashtu janë anëtare të QUINT-it.
Në fund të shkëmbimit të mendimeve, ambasadorët e shteteve anëtare të BE-së i kanë bërë thirrje shefit të diplomacisë evropiane, Josep Borrell që të përpilojë një raport mbi progresin e Kosovës në zbatimin e kërkesave ekzistuese të BE-së.
Pas dorëzimit të këtij raporti, BE sërish pritet t’i kthehet çështjes së heqjes eventuale të masave restriktive ndaj Kosovës.