Sot, Baleti Kombëtar i Kosovës pati kënaqësinë të mirëpresë Ambasadoren e Kosovës në Panama, Heroina Telaku. Gjatë takimit me balerinët, ambasadorja ndau disa fjalë rreth turneut ndërkombëtar që Baleti Kombëtar do të zhvillojë në muajin maj në El Salvador, Panama dhe Kolumbi.
Gjatë vizitës, u diskutua rëndësia e promovimit të kulturës kosovare jashtë vendit dhe u vlerësua përkushtimi i trupës së baletit për të përfaqësuar dinjitetshëm Kosovën në arenën ndërkombëtare.
Drejtuesit e Baletit Kombëtar shprehën mirënjohje për Ambasadoren Telaku dhe Ambasadorin e Kosovës në Kolumbi, Artan Duraku, për mbështetjen dhe bashkëpunimin e tyre në realizimin e këtij turneu. Po ashtu, falënderime u dhanë edhe Ministrisë së Kulturës dhe Turizmit dhe Ministrisë së Punëve të Jashtme për përkrahjen e vazhdueshme të institucionit, përcjell KultPlus
Ky takim i sotëm shënon një hap të rëndësishëm për përgatitjet e Baletit Kombëtar, i cili synon të promovojë artin dhe identitetin kulturor të Kosovës në skenat ndërkombëtare./KultPlus.com