Koreja e Jugut e nisi me fitore aventurën e saj në Kupën e Botës 2026, duke mposhtur Çekinë me rezultat 2-1 në ndeshjen e Grupit A, të zhvilluar në stadiumin e Guadalajara-s.
Pas një pjese të parë pa gola, sfida u ndez në 45 minutat e dyta, ku koreanët treguan karakter dhe përmbysën disavantazhin për të siguruar tre pikë të rëndësishme.
Çekia kaloi e para në epërsi në minutën e 59-të falë kapitenit Ladislav Krejci, i cili realizoi me kokë pas një aksioni nga goditja anësore.
Megjithatë, reagimi i Koresë së Jugut ishte i menjëhershëm, mesfushori Hwang In-beom barazoi shifrat në minutën e 67-të pas një depërtimi të zgjuar në zonë.
Kur dukej se ndeshja po shkonte drejt barazimit, zëvendësuesi Oh Hyeon-gyu shënoi golin e fitores në minutën e 80-të, duke finalizuar një asistim të Hwang In-beom dhe duke vulosur përmbysjen e ekipit aziatik.
Me këtë sukses, Koreja e Jugut merr një start ideal në Grupin A, ndërsa Çekia mbetet pa pikë.