Leoni XIV dërgon një telegram solidariteti të nënshkruar nga kardinali Parolin për një nga fatkeqësitë më të mëdha natyrore në historinë e vendit. Në vështirësi, rajonet lindore të Kunar dhe Nangarhar, me gati tre mijë të plagosur, por ndihma e shpejtë vuan nga mungesa e mjeteve dhe e financave. Talebanët i bëjnë thirrje bashkësisë ndërkombëtare për ndihmë

 

Afganistani lindor u godit mbrëmë(31 gusht) nga një tërmet, që deri tani ka shkaktuar mbi 800 të vdekur e më se 2.800 të plagosur, por bilanci nuk është përfundimtar. Papa Leoni XIV dërgoi menjëherë një mesazh afërsie përmes Sekretarit të Shtetit të Vatikanit, kardinalit Pietro Parolin. Në një telegram, Ati i Shenjtë lutet për "të gjithë ata, që janë prekur nga kjo tragjedi", duke ia besuar "provanisë së Zotit të Gjithëpushtetshëm" e duke shprehur "solidaritetin e tij të sinqertë, veçanërisht me ata, që po vajtojnë humbjen e të afërmve, me personelin e emergjencës dhe me autoritetet civile të angazhuara në ndihmën e shpejtë". Papa i kërkon Hyjit "ngushëllim dhe forcë" për popullin afgan në këtë "kohë të vështirë".

 

 

Dje në orën 23.47, një tërmet me magnitudë 6.0 me epiqendër 27 kilometra në lindje-verilindje të qytetit të Jalalabad-it, u dëgjua në të gjithë Afganistanin si një nga katastrofat natyrore më të mëdha në historinë e vendit, me përmasa të paimagjinueshme dhe me një barrë praktikisht të papërballueshme për shtetin e udhëhequr nga talebanët, i cili duhet të gjejë zgjidhje për disa kriza humanitare, si edhe për miliona refugjatët e dëbuar nga Irani dhe Pakistani. Zëdhënësi i Ministrisë së Shëndetësisë, Sharafat Zaman, i bëri thirrje për ndihmë bashkësisë ndërkombëtare.

 

 

Ekipet e ndihmës po përpiqen të arrijnë në zonat e prekura, në këto rajone malore në kufi me Pakistanin, të cilat nuk kanë komunikim me pjesën tjetër të vendit. Ministria e Shëndetësisë nënvizon se ka mobilizuar të gjitha mjetet në dispozicion për shpërndarjen e ushqimeve e të mallrave të tjera. Pamjet e transmetuara nga Reuters Television tregojnë helikopterë, që lëvizin ndërmjet spitaleve. Ekipet ushtarake të ndihmës janë tejet të reduktuara, sipas Ministrisë së Mbrojtjes, e cila ka realizuar vetëm rreth dyzet transporte ajrore për 420 të vdekur e të plagosur.

 

Ky është tërmeti i tretë katastrofik në Afganistan që kur talebanët u rikthyen në pushtet në vitin 2021, pas tërheqjes së forcave ndërkombëtare dhe shkurtimeve të financimeve qeveritare. Edhe ndërhyrjet humanitare kanë rënë ndjeshëm: 767 milionë dollarë këtë vit, në krahasim me mbi 3,5 miliardë dollarë vetëm në vitin 2022. Agjencitë ndërkombëtare humanitare denoncojnë krizën e lënë pas dore në Afganistan, ku më se gjysma e popullsisë ka nevojë për ndihmë urgjente. Deri tani, raporton Ministria e Jashtme Afgane, asnjë qeveri nuk është ofruar ende për t’i dhënë ndihmën e nevojshme popullsisë. Në një postim në X, Sekretari i Përgjithshëm i OKB-së, Antonio Guterres, deklaroi se zyrtarët e OKB-së në Afganistan po punojnë për të ofruar ndihmën fillestare, ndërsa, në një postim në të njëjtën platformë, Komisioneri i Lartë i OKB-së për Refugjatët, Filippo Grandi, shprehu sigurinë se “bashkësia e donatorëve nuk do të hezitojë të mbështesë përpjekjet për ndihmë"./Radio Vatikani