Qindra banorë të Ceutës protestuan të dielën duke kërkuar një përgjigje “të menjëhershme, vendimtare dhe proporcionale” ndaj krizës së migracionit. Tubimi u organizua nga katër komunitetet fetare të qytetit: të krishterët, myslimanët, hebrenjtë dhe hindusët.
Protesta u mbajt në Sheshin e Kushtetutës nën sloganin “Mjaft është mjaft, Ceuta nuk do të dorëzohet”, ndërsa disa protestues kritikuan qeverinë në Madrid, duke e akuzuar për “braktisje”.
“Ceuta nuk është në shitje. Ceuta është Spanjë” dhe “Sánchez, jep dorëheqje” ishin disa nga thirrjet e protestuesve. Një pjesë e tyre më pas marshuan drejt Delegacionit të Qeverisë në qytet.
Tensionet u rritën në Plaza de los Reyes pas mbërritjes së aktivistit politik të ekstremit të djathtë, Vito Quiles, të cilin disa persona nga turma e akuzuan se kishte ardhur për të “përçarë” banorët e Ceutës.
Ndërkohë, presidenti i Ceutës, Juan Jesús Vivas, ka kërkuar më shumë burime dhe personel të sigurisë nga qeveria qendrore, duke e cilësuar situatën “absolutisht të paqëndrueshme”.
Qeveria ka identifikuar 1 mijë e 342 të mitur migrantë të pashoqëruar, ndërsa të tjerë ende nuk janë regjistruar. Vivas ka thënë se qëndrimi i qeverisë së tij është që ata të kthehen në Marok.
“E vetmja rrugëdalje është Maroku përmes pikës kufitare Tarajal”, tha ai.
Ministria për Rininë dhe Fëmijët ka theksuar se secili rast duhet të shqyrtohet individualisht. Ministrja Sira Rego ka mbrojtur ribashkimin familjar “sa herë që është e mundur”, duke thënë se për të miturit që nuk kanë familje, komunitetet autonome duhet të veprojnë si kujdestarë dhe t’u garantojnë të drejtat.
Kriza ka nxitur edhe tensione politike mes Spanjës dhe Italisë për kontrollet kufitare. Spanja dhe Italia e kanë informuar Komisionin Evropian se masat e tyre janë të përkohshme. / Euro News