Nga sot në Maqedoninë e Veriut, Shqipëri dhe Kosovë, hyjnë në fuqi tri marrëveshjet e nënshkruara më 3 nëntor, në kuadër të Procesit të Berlinit.
Ministri i Punëve të Jashtme i Maqedonisë së Veriut, Bujar Osmani, ka bërë të ditur se marrëveshjet që kanë hyrë sot në fuqi ndërmjet Maqedonisë së Veriut, Kosovës dhe Shqipërisë, janë:
Marrëveshja për lëvizjen e lirë në Ballkanin Perëndimor me letërnjoftime
Marrëveshja për njohjen e kualifikimeve të arsimit të lartë dhe
Marrëveshja për njohjen e kualifikimeve profesionale të mjekëve, stomatologëve dhe arkitektëve.
“Lëvizja e lirë e personave vetëm me letërnjoftime brenda Ballkanit Perëndimor, lëvizshmëria e studentëve, profesorëve dhe punonjësve akademikë, ndërsa procedurat e njohjes shkurtohen nga disa muaj në dy javë dhe pa shpenzime”, ka njoftuar Osmani përmes një postimi në rrjetin social Facebook.
Osmani ka thënë se marrëveshjet paraqesin hap të rëndësishëm në përpjekjet tona për t'i ofruar qytetarëve lirinë e lëvizjes dhe integrimit, si kusht për krijimin e një tregu të përbashkët rajonal, si rruga më e sigurt dhe më e shpejtë drejt qëllimit tonë të përbashkët - anëtarësimit në Bashkimin Evropian.