Tensionet mes Indisë dhe Pakistanit kanë shpërthyer në një krizë të re kufitare, me dhjetëra viktima civile nga të dyja palët. Sulmet ajrore dhe artileria e rëndë kanë shkaktuar pasoja të rënda. Nga Londra zyrtare kërkohet përmbajtje urgjente.
Të paktën 26 persona janë vrarë dhe 46 të tjerë janë plagosur në Pakistan dhe në rajonin e kontrolluar prej tij në Kashmir, pas një serie sulmesh ajrore të ndërmarra nga India. Nga ana tjetër, ushtria indiane raporton se 15 civilë indianë janë vrarë dhe 43 janë plagosur nga bombardimet pakistaneze në zonat Poonch dhe Tangdar në Kashmirin e administruar nga India.
Ky bilanc tragjik dëshmon për përshkallëzimin më të madh të tensioneve mes dy fuqive bërthamore në Azinë Jugore në muajt e fundit.
Sipas Delhit zyrtar, janë goditur nëntë objekte që shërbenin si infrastrukturë terroriste, pa goditur instalacione ushtarake pakistaneze dhe në mënyrë jo përshkallëzuese. Megjithatë, Islamabadi I ka hedhur poshtë këto pretendime, duke i cilësuar bazat terroriste si trillime dhe ka theksuar se gjashtë lokacione civile janë goditur dhe se pesë avionë luftarakë indianë janë rrëzua.
India insiston se nuk ka informacione për viktima civile në territorin pakistanez, ndërsa Pakistani kërcënon se do të përgjigjet në kohën dhe mënyrën që do të zgjedhë vetë. Përplasjet kanë prekur gjithashtu trafikun ajror në rajon, me gati 550 fluturime të anuluara në Indi dhe Pakistan.
Këto tensione kanë nxitur reagime të shpejta ndërkombëtare. Sekretari i Jashtëm i Mbretërisë së Bashkuar, David Lammy, deklaroi se situata mes Indisë dhe Pakistanit është një shqetësim serioz, dhe u bëri thirrje të dy vendeve të tregojnë përmbajtje dhe të angazhohen në dialog të drejtpërdrejtë diplomatik.
Konflikti në Kashmir ka qenë burim tensionesh të vazhdueshme mes dy vendeve që prej ndarjes së Indisë më 1947. Qindra mijëra jetë janë humbur për shkak të kryengritjeve, operacioneve ushtarake dhe përplasjesh ndërkufitare.