Agjencia e Brukselit, EurActiv, shkruan sot se Sali Berisha është rikthyer në krye të Partisë Demokratike.
“Ish-presidenti, ish-kryeministri dhe bashkëthemeluesi i Partisë Demokratike, Sali Berisha është zgjedhur edhe njëherë kryetar i Partisë Demokratike të Shqipërisë, pas nëntë vitesh tërheqje.
Kryetari i mëparshëm, Lulzim Basha, dha dorëheqjen në fillim të këtij viti pas një ndarje në parti, protestave dhe trazirave të brendshme,” shkruan agjencia.
Sipas EurAciv, pas presionit të vazhdueshëm dhe popullaritetit në rënie, Basha dha dorëheqjen.
“Pavarësisht kundërshtive ndaj tij, Berisha duket se gëzon mbështetjen e shumicës së mbështetësve dhe anëtarëve të PD-së,” shkruan agjencia.
“Berisha pretendon se Basha kishte një marrëveshje të heshtur me kryeministrin Edi Rama për të përfituar nga pushteti duke qëndruar në opozitë. Ai kandidoi me premtimin për të rikthyer opozitën ndaj qeverisjes së Ramës, të cilën ai e akuzon për kapje të shtetit dhe bashkëpunim me mafian”.