Presidenti amerikan Donald Trump ka kërcënuar Bashkimin Europian me vendosjen e tarifave të rënda dhe madje me kufizime në tregti, pasi Brukseli propozoi që Kanadaja të bëhet anëtarja e parë “e asociuar” e BE-së.
Gjatë një prononcimi për mediat, Trump e cilësoi si “qesharake” idenë e një afrimi të tillë mes Kanadasë dhe Bashkimit Europian dhe paralajmëroi se reagimi i Uashingtonit do të varet nga qëllimet që ai i atribuon këtij propozimi.
“Nëse është një akt armiqësor, do të vendos tarifa shumë të rënda”, deklaroi Trump.
Ai shtoi se nëse SHBA-ja vlerëson se Europa ka “qëllime të këqija”, Uashingtoni mund të vendosë tarifa shumë të larta ndaj vendeve europiane.
“Nëse kanë qëllime të mira, shumë mirë. Nëse kanë qëllime të këqija, do të vendosim tarifa shumë të rënda ndaj Europës”, tha presidenti amerikan.
Trump la gjithashtu të hapur mundësinë e ndërprerjes së tregtisë me Europën në disa sektorë.
Presidenti amerikan kritikoi edhe Kanadanë, duke e cilësuar si një “partner të tmerrshëm tregtar” të Shteteve të Bashkuara.
Propozimi i von der Leyen
Deklaratat e Trump erdhën një ditë pasi presidentja e Komisionit Europian, Ursula von der Leyen, propozoi që Kanadaja të bëhet anëtarja e parë “e asociuar” e Bashkimit Europian.
Propozimi u bë gjatë fjalimit të saj vjetor për gjendjen e Bashkimit Europian në Parlamentin Europian, në Strasburg, ku ishte i pranishëm edhe kryeministri kanadez Mark Carney.
Von der Leyen deklaroi se dëshiron të hapë rrugën për një formë të re dhe shumë më të afërt bashkëpunimi me Kanadanë, që do të përfshinte tregtinë, mbrojtjen, teknologjinë, energjinë, mineralet kritike dhe çështjet që lidhen me Arktikun.
“Do të doja të punoja me ju për t’i hapur derën Kanadasë si anëtarja e parë e asociuar e BE-së”, tha von der Leyen, duke iu drejtuar kryeministrit Carney.
Ky status nuk ekziston aktualisht në traktatet e Bashkimit Europian dhe detajet ligjore e institucionale të mënyrës se si mund të zbatohet ende nuk janë përcaktuar. Për këtë arsye, propozimi përfaqëson një formë të re partneriteti dhe jo anëtarësim të plotë në BE.
Von der Leyen tha se Brukseli dhe Ottawa synojnë të ndërtojnë një “aleancë për të ardhmen”, duke u mbështetur edhe te marrëveshja ekzistuese e tregtisë së lirë mes BE-së dhe Kanadasë, CETA. Bashkëpunimi i propozuar do të shtrihej përtej tregtisë, në fusha si mbrojtja, inteligjenca artificiale, energjia dhe lëndët e para kritike.
Kryeministri kanadez Mark Carney ka deklaruar më herët se Ottawa dëshiron të ndërtojë një “aleancë unike” me Bashkimin Europian, pa kërkuar anëtarësim të plotë në Union./Top Channel