Komandanti i Forcës së Sigurisë së Kosovës (FSK), Gjenerallejtënant Bashkim Jashari, priti në takim Zëvendës Shefin e J5/8 të Komandës Evropiane të Shteteve të Bashkuara (USEUCOM), Gjeneral Brigade Chris A. McKinney.
Gjatë takimit, të dy gjeneralët diskutuan bashkëpunimin ekzistues ndërmjet FSK-së dhe USEUCOM-it, si dhe mundësitë për thellimin e këtij bashkëpunimi në të ardhmen. Ata vlerësuan marrëdhëniet e deritanishme dhe theksuan rëndësinë e forcimit të mëtejshëm të tyre në fushën e sigurisë dhe mbrojtjes.
Gjeneral Jashari e informoi Gjeneral McKinney mbi zhvillimet dhe arritjet e FSK-së, duke u fokusuar edhe në planet strategjike për të ardhmen, të cilat synojnë avancimin drejt realizimit të aspiratës për anëtarësim në NATO.
Në takim u diskutua gjithashtu edhe për kontributin e FSK-së në kuadër të Forcës Ndërkombëtare Stabilizuese për Gazën (ISF), ku pritet që së shpejti të dislokohet kontingjenti i parë i trupave të FSK-së.
Në përmbyllje, Gjeneral McKinney falënderoi Gjeneral Jasharin për lidershipin dhe bashkëpunimin e deritanishëm, duke ritheksuar përkushtimin e USEUCOM-it për të vazhduar mbështetjen ndaj FSK-së edhe në të ardhmen.