E ngarkuara me punë në ambasadën e Shteteve të Bashkuara në Prishtinë, Anu Prattipati, mori pjesë në prezantimin e një dokumenti politikash të përgatitur nga Oda Ekonomike Amerikane në Kosovë, që fokusohet në përdorimin e Gazit Natyror të Lëngshëm (LNG), shkruan Gazeta Metro.
Ambasada amerikane bëri të ditur përmes një njoftimi se ky burim energjie shihet si një mundësi për të rritur stabilitetin dhe pavarësinë energjetike të vendit.
Në deklarimet e saj, Prattipati theksoi se SHBA mbetet e gatshme të bashkëpunojë me Kosovën në zhvillimin e burimeve të sigurta dhe të diversifikuara të energjisë, si dhe në tërheqjen e investimeve të reja në këtë sektor.
“Shtetet e Bashkuara janë të pozicionuara për të bashkëpunuar me Kosovën në avancimin e zgjidhjeve të sigurta dhe të diversifikuara energjetike, si dhe për të tërhequr investime të ardhshme. Siguria Energjetike është Siguri Kombëtare”, tha ajo./gazetametro.net