Republika e Kosovës nga 1 gushti ka vendosur të heqë tarifën 10% ndaj mallrave amerikane, duke hyrë kështu në mesin e një numri mjaft të vogël shtetesh që përdorin politikën e 0% tarifave në tregti me shtetet tjera. Edhe pse Kosova nuk ka marrëveshje për tregti të lirë (Free Trade) me SHBA-në, sidoqoftë si një akt i vullnetit të mirë, Kosova ka vendosur të mos përdorë tarifa ndaj mallrave të aleatit kryesor, shkruan Gazeta Metro.
Vendimi i qeverisë në detyrë u mor sot, teksa ishte paralajmëruar muaj më parë, ose më mirë thënë, ishte kërkuar nga presidentja e Kosovës, pas njoftimit të presidentit amerikan për vendosjen e tarifave ndaj një pjese të madhe të botës. Vlen të theksohet se sipas Gjykatës Supreme në Kosovë, edhe ky vendim me gjasë është në kundërshtim me ligjin, meqë qeveria është në detyrë dhe jo me kompetenca të plota.
Megjithatë, Ministria e Financave në Kosovë tha se vendimi i aprovuar sot është një hap i rëndësishëm drejt forcimit të mëtejshëm të marrëdhënieve ekonomike dhe tregtare ndërmjet Kosovës dhe Shteteve të Bashkuara të Amerikës.
“Ky hap pritet të nxisë rritjen e këmbimit tregtar dhe të krijojë kushte më të favorshme për investime të reja nga kompanitë amerikane”, thuhet në njoftimin e këtij institucioni.
Kosova që nga paslufta kishte një masë të tarifës doganore prej 10% për produktet me origjinë nga SHBA-ja, pra për të blerë një mall amerikan, një biznes duhej të paguante 10% më shtrenjtë për shkak të kësaj mase.
Në fillim, kur presidenti Donald Trump paralajmëronte tarifa për pothuajse të gjitha vendet e botës, Kosova parashihej të goditej me një tarifë reciproke prej 10%. Sidoqoftë, kjo masë nuk është më në agjendë të Shtëpisë së Bardhë, pra ndaj Kosovës nuk do të vendoset asnjë masë tarifore.
Por, nga gushti e tutje, të gjitha mallrat amerikane do të hyjnë në Kosovë pa ndonjë tarifë, pra me normë prej 0%. Kjo do të thotë se bizneset në Kosovë nuk do të paguajnë asnjë cent më shtrenjtë se çmimi i vendosur për produktet amerikane.
Përpos përfitimit në anën politike, Kosova bën një hap po ashtu të rëndësishëm në rrafshin ekonomik me synimin që të ketë nxitje të investimeve nga kompanitë amerikane.
Sipas matjeve, vitin e kaluar Kosova ka importuar mallra në vlerë prej 106 milionë eurosh nga SHBA-ja, ndërsa ka eksportuar produkte në vlerë prej 39 milionë eurosh drejt Amerikës.
Tregtia e lirë është një vlerë themelore që hyn në katalogun e pasur të ideve të lirisë, ndërsa Kosova ka vendosur që pikërisht këtë parim ta përdorë tash në raport me Shtetet e Bashkuara. Më herët, Kosova kishte nënshkruar edhe CEFTA-në, marrëveshje për tregti të lirë me vendet fqinje të Ballkanit Perëndimor, por ka pasur probleme me Serbinë në disa raste./gazetametro.net