Vrasja e 49-vjeçares Arlinda Zekaj, e cila ndodhi më 25 tetor 2026 në fshatin Vitomiricë të Pejës, nxiti reagime të shumta publike dhe thirrje për përgjegjësi institucionale, transmeton Gazeta Metro.
Në postimet që po qarkullojnë në rrjetet sociale, po kërkohet ndërmarrja e masave ndaj zyrtarëve dhe institucioneve që kanë pasur përgjegjësi në trajtimin e rastit të saj.
Ndër kërkesat e ngritura janë largimi i prokurores Suada Hamza dhe kryeprokurores Lumturije Vuçetaj, dorëheqja e ministres së Drejtësisë, Donika Gërvalla, si dhe shkarkimi i zyrtarëve policorë në Pejë.
Reagimet publike vijnë pas raportimeve se Zekaj kishte kërkuar mbrojtje nga institucionet kompetente vetëm pak ditë para se të vritej, për shkak të rrezikut me të cilin dyshohet se po përballej.
Rasti riktheu në vëmendje çështjen e trajtimit institucional të rasteve të dhunës dhe efektivitetin e mekanizmave për mbrojtjen e personave që raportojnë se janë në rrezik.
Thirrjet publike përqendrohen në nevojën për sqarimin e përgjegjësive, shqyrtimin e veprimeve të institucioneve përkatëse dhe marrjen e masave, në përputhje me ligjin, nëse evidentohen shkelje apo neglizhencë./gazetametro.net