Festa liturgjike e Nënë Terezës u kremtua në të gjitha kishat e trevave shqiptare. Nga katedralja kushtuar asaj në dioqezën e Sapës, në kryeipeshkvinë metropolite të Shkodër-Pultit, në Lezhë, në Administraturën e Jugut, në Tiranë (ku u lidh marrëveshja me bashkinë për ndërtimin e shenjtërores së Nënë Terezës në kodrat e liqenit), në Rrëshen, ku u mblodhën shumë nga motrat e shenjtes shqiptare e në Kosovë, në katedralen e Prishtinës, gjithnjë kushtuar Nënë Terezës.
Festa liturgjike e Nënë Terezës u kremtua sivjet në një përvjetor të veçantë. U mbushën 25 vite nga vdekja e shenjtes shqiptare të bamirësisë, të cilën gjithë bota e kujton për shërbimin shembullor në favor të më të varfërve ndër të varfër. E, me gëzim të veçantë, 5 shtatori, por edhe përvjetori i shenjtërimit, një ditë më parë, u kremtuan në të gjitha trevat shqiptare e kudo ku ka shqiptarë nëpër botë.
Në dioqezën e Sapës
Në dioqezën e Sapës, katedralja i është kushtuar pikërisht Nënë Terezës. Festa e shenjtes shqiptare u parapri nga tri ditë lutje dhe adhurim në nder të saj. E, gjatë meshës së 5 shtatorit, ditë që përkoi edhe me 10-vjetorin e Shtëpisë së Bamirësisë në këtë dioqezë, të varfrit e të sëmurët ishin në vend të parë. Kremtimin e kryesoi ipeshkvi i Sapës, imzot Simon Kulli, në bashkëkremtim me kryeipeshkvin e dioqezës italiane Reggio Emilia, imzot Giacomo Morandi, me famullitarin dom Mark Shtjefni e meshtarë të tjerë. Homelia u mbajt nga imzot Morandi, dioqeza e të cilit është mbështetje e fuqishme për Shtëpinë e Bamirësisë. Për t’i shëmbëllyer sadopak Nënë Terezës, siç ndodh shpesh në Sapë, dreka festive u shtrua për njerëzit me aftësi ndryshe në mensën e Karitasit dioqezan. Ndër veprimtaritë e tjera, edhe një koncert, lojra bamirësie e aktivitete kulturore.
Në kryedioqezën Shkodër-Pult
Në kryedioqezën metropolitane të Shkodër-Pultit, meshën e rastit e kremtoi kryeipeshkvi, imzot Angelo Massafra, në kuvendin e Motrave Misionare të Bamirësisë, që vijojnë punën e Nënë Terezës në gjithë territorin e mbuluar nga dioqeza. Meshë edhe në Lezhë, ndërkaq, në Rrëshen, ipeshkvi, imzot Gjergj Meta, kremtoi meshën dhe festoi të kremten e madhe së bashku me motrat, që shkuan në atë qytet nga Elbasani, Tirana, Durrësi, Puka dhe Shkodra. “Në shtëpitë e tyre – shkruan imzot Gjergj Meta në Facebook - motrat vazhdojnë të kujdesen për të moshuar e të moshuara, për të braktisur e të sëmurë, duke i larë, pastruar e duke u kujdesur për ta. Shpesh mes sakrificash të shumta. Nga ana jonë, përkundër fasadave dhe premtimeve, nevojitet veprim konkret që varfëria e familjeve shqiptare të luftohet, pasi ajo ende mbetet e lartë. Jo vetëm një varfëri materiale, por edhe ajo e vetmisë e sidomos e shëndetit mendor dhe shpirtëror. Kësisoj Nënë Tereza nuk mbetet vetëm simboli i një krenarie boshe, ndërtuar mbi gërmadhat dhe skeletet e varfërisë e të përjashtimit social, por kthehet në burim frymëzimi, që me anë të një dashurie vepruese, vokacioni i përnjmendtë i shenjtërve, të mund të lehtësojmë sadopak barrën e varfërisë”.
Në kryedioqezën Tiranë-Durrës
Në kryedioqezën metropolite të Tiranë-Durrësit, përveç meshës në katedralen e Shën Palit, në qendër të kryeqytetit, edhe një lajm tjetër i mirë.
Bashkia e Tiranës dhe kryeipeshkvia nënshkruan një memorandum për ndërtimin e shenjtërores së Nënë Terezës në kryeqytet. Akoma nuk janë bërë të njohura të gjitha hollësitë, por dihet se shenjtërorja do të ngrihet në kodrat e liqenit.
Në Kosovë
Së fundi, në Kosovë, në katedralen tjetër kushtuar Nënë Terezës, në Prishtinë, meshën solemne e kryesoi imzot Zef Gashi. Veprimtaritë në nder të shenjtes shqiptare të bamirësisë filluan që dhjetë ditë më parë, duke mbuluar gjithë periudhën që shkon nga 26 gushti, dita e lindjes së Nënë Terezës për këtë botë, deri më 5 shtator, dita e lindjes së saj për Qiell. Ipeshkvi, imzot Dodë Gjergji, u takua shpesh me motrat dhe me besimtarët, të cilët i nxiti të ndjekin shembullin dhe mendësinë e shenjtes në jetën e tyre./Radio Vatikani