Viti 2023 do të mbahet në mend si periudha kur Tirana dhe Prishtina u shndërruan në skena të vërteta ndërkombëtare, të cilat u vizituan nga emra që mbartin rëndësi të lartë për artin, kulturën dhe kombin shqiptar.
Kryeqytetet shqiptare të Shqipërisë dhe Kosovës respektivisht, jo vetëm që mirëpritën personalitete me famë botërore, por i nderuan ata me një nga mirënjohjet më të larta – ‘Çelësi i Qytetit’, një gjest që simbolizon respektin dhe vlerësimin e kontributit të tyre në fusha të ndryshme.
Telegrafi këtë fillimvit është krenar të sjellë një retrospektivë të mirënjohjeve të veçanta që u dhuruan gjatë vitit 2023 nga kryetarët e dy qendrave urbane të Shqipërisë, Përparim Rama dhe Erion Veliaj, figurave që kanë lënë gjurmë në zemrat e qytetarëve dhe në historinë e dy metropolëve shqiptare.
Ismail Kadare – Çelësi i Prishtinës
Në një ditë të veçantë të qershorit të vitit 2023, Prishtina nderoi një nga figurat më të shquara të letërsisë shqipe, Ismail Kadare.
Në një ceremoni të mbajtur në kryeqytetin e Kosovës, Kryetari i Prishtinës, Përparim Rama, i dorëzoi shkrimtarit të njohur dhe bashkëshortes së tij, Helena Kadare, Çelësin e Qytetit. Akti i nderimit u bë në shenjë të njohjes së kontributit të madh të Kadaresë në promovimin dhe ngritjen e letërsisë shqipe në arenën botërore.
Rama, gjatë një postimi në rrjetet sociale, e cilësoi Kadarenë si një frymëzim për breza të tërë dhe njoftoi se një bibliotekë në Prishtinë do të marrë emrin e tij si një vend i përhershëm nderimi dhe frymëzimi.
“Veprat e tij e kanë ngritur letërsinë shqipe në nivel botëror dhe vazhdojnë të frymëzojnë tash e sa gjenerata”, shprehu Rama, duke theksuar rëndësinë e Kadaresë si figurë kulturore dhe si model për të rinjtë që ndjekin rrugën e artit dhe të krijimit.
Enrique Iglesias – Çelësi i Tiranës
Enrique Iglesias me ‘Çelësin e Qytetit’ të Tiranës (Foto: Erion Veliaj/Instagram)
Kryeqyteti shqiptar, Tirana, u bë skenë e një ngjarjeje të rrallë kur në qendrën e saj vjen për të performuar këngëtari të famshëm spanjoll, Enrique Iglesias. Po në këtë qytet ku ritmet e muzikës spanjolle do të përhapeshin në ajër, Iglesias u prit nga Kryetari i Tiranës, Erion Veliaj, në zyrën e tij.
Në shenjë mirënjohje për kontributin e tij në muzikë dhe si një simbol i bashkimit përmes artit dhe kulturës, Veliaj i dorëzoi këngëtarit Çelësin e Qytetit.
Enrique Iglesias, i cili ka një bashkësi të madhe adhuruesish në Shqipëri, u prit me entuziazëm të madh dhe u shpreh i lumtur për ngrohtësinë dhe pranimin që gjeti.
“Jam jashtëzakonisht i lumtur të jem këtu. Është suprizë e madhe t’ju takoj”, u shpreh ai, duke ndarë emocionet e tij para koncertit që pritej të mbante në qendër të Tiranës.
Ricky Martin – Çelësi i Tiranës
Ricky Martin me ‘Çelësin e Qytetit’ të Tiranës (Foto: Erion Veliaj/Instagram)
Vizita e një tjetër ylli të famshëm latin, Ricky Martin, u bë një nga pikat kyçe të ngjarjeve kulturore në Tiranë gjatë vitit 2023.
Këngëtari, i dashur për energjinë dhe pasionin që sjell në skenë, arriti në Tiranë për të dhënë një koncert që pritej me padurim nga të gjithë adhuruesit e muzikës latine. Përpara se të ndezte skenën, Martin u prit nga Kryetari i Tiranës në zyrën e tij, ku padyshim u nderua me Çelësin e Qytetit.
Emocionuar dhe falenderues, Martin u shpreh mirënjohjen e thellë për këtë nderim të veçantë. “Do të jetë shumë speciale!” u shpreh ai, duke premtuar një natë të mbushur me dashuri, ndershmëri dhe pasion, vlera që ai përfaqëson dhe që janë në zemër të kulturës së tij Puerto-Rikan.
Rita Ora dhe Taika Waititi – Çelësi i Prishtinës
Rita Ora me ‘Çelësin e Qytetit’ të Prishtinës (Foto: Përparim Rama/Instagram)
Prishtina u bë shtëpi për një festë të veçantë kur këngëtarja e famshme Rita Ora zgjodhi atë si destinacionin për të festuar ditëlindjen e saj.
Së bashku me bashkëshortin e saj, talentin e hollivudit Taika Waititi, ata u mirëpritën nga figura të larta të shtetit dhe përfunduan vizitën e tyre me një takim të veçantë me Kryetarin e Prishtinës, Përparim Rama.
Në një ceremoni të mbushur me emocion, Rama iu dhuroi çiftit Çelësin e Prishtinës si shenjë e vlerësimit të kontributeve të tyre në art dhe kulturë dhe si mirënjohje për përfaqësimin e tyre në botë.
Taika Waititi me ‘Çelësin e Qytetit’ të Prishtinës (Foto: Përparim Rama/Instagram)
Rita Ora, e cila vazhdimisht ka shprehur krenarinë për rrënjët e saj shqiptare, dhe Taika Waititi, e morën këtë nderim si një simbol të lidhjes së fortë që ata kanë me vendlindjen e Ritës dhe mirënjohjen që Prishtina ka për ata.
Ky moment u dokumentua nga vetë Rama në rrjetet sociale, duke përshkruar Rita Orën si një përfaqësuese dinjitoze dhe duke i falënderuar për kontributin që ajo ka bërë në promovimin e Kosovës përmes artit të saj. /Telegrafi/