Bordi i Paqes, i mbështetur nga Shtetet e Bashkuara, ka propozuar një plan gjashtëmujor në vlerë prej 2.45 miliardë dollarësh për nisjen e rindërtimit të Gazës dhe rikthimin e shërbimeve bazë, raporton The National.
Plani, i prezantuar në New York në margjinat e Asamblesë së Përgjithshme të OKB-së, përfshin 66 projekte dhe synon të mbështesë planin 20-pikësh të presidentit amerikan Donald Trump për përfundimin e luftës Izrael-Hamas.
Sipas The National, projektet përfshijnë nisma në infrastrukturë, arsim dhe shëndetësi, ndërsa faza e parë synon të adresojë nevojat më urgjente të Gazës dhe të krijojë bazën për rindërtimin afatgjatë.
Bordi ka vlerësuar se rindërtimi i infrastrukturës fizike në Gazë do të kushtojë rreth 35.2 miliardë dollarë në periudhën afatmesme dhe 71.4 miliardë dollarë të tjerë gjatë dekadës së ardhshme.
Anëtari i bordit ekzekutiv, Jared Kushner, tha se synimi është që palestinezëve në Gazë t’u krijohet mundësia të përqendrohen në përmirësimin e jetës së tyre.
“Po ndërtojmë diçka që në të vërtetë është një platformë për t’i mundësuar popullit palestinez në Gazë që më në fund të përqendrohet në përmirësimin e jetesës dhe të jetës së tij”, tha Kushner.
Ai tha se synimi përfundimtar është një Gazë e çmilitarizuar dhe shtoi se Hamas ka rënë dakord t’i dorëzojë armët, por se kjo duhet të zbatohet.
Përfaqësuesi i Lartë i Bordit të Paqes për Gazën, Nickolay Mladenov, tha se sfida e radhës është kalimi nga planifikimi në zbatim.
“Qëllimi ynë është të kalojmë në fazën tjetër, pra nga planifikimi në zbatim”, tha Mladenov.
Ndërkaq, Ali Shaath, komisioner kryesor i Komitetit Kombëtar për Administrimin e Gazës, tha se rindërtimi pritet të përfshijë të gjithë Rripin e Gazës dhe të nisë nga Rafah, për të vazhduar më pas në Khan Younis, kampet qendrore, qytetin e Gazës dhe veriun e Gazës.
Shaath tha se synimi është rikthimi i shërbimeve bazë dhe që palestinezëve t’u jepet mundësia ta formësojnë të ardhmen e tyre, duke kundërshtuar zhvendosjen e tyre nga Gaza.
“Ne jemi kundër evakuimit të banorëve të Gazës jashtë Gazës. Duam që ata të qëndrojnë dhe të jetojnë në Gazë, me shpresë dhe prosperitet”, tha ai.