Një raport i fundit i OKB-së zbulon se Koreja e Veriut po rrit ndjeshëm përdorimin e dënimit me vdekje, përfshirë ndaj qytetarëve që shikojnë apo ndajnë filma dhe drama televizive të huaja.
Raporti, i bazuar në mbi 300 intervista me të arratisur nga Koreja e Veriut, vëren se që nga viti 2015 janë futur të paktën gjashtë ligje të reja që parashohin dënimin kapital. Të arratisurit dëshmojnë për ekzekutime publike nga skuadra pushkatimi, të përdorura për të përhapur frikë.
Komisioneri i Lartë i OKB-së për të Drejtat e Njeriut, Volker Türk, paralajmëroi se nëse kjo situatë vazhdon, popullsia koreano-veriore do të përballet me “vuajtje edhe më të mëdha, shtypje brutale dhe frikë”.
Raporti dokumenton gjithashtu kontrollin ekstrem shtetëror ndaj jetës së qytetarëve, kequshqyerje masive, punë të detyruar, dhe burgosje politike. OKB kërkon që çështja të kalojë në Gjykatën Ndërkombëtare Penale, por kjo po pengohet nga Kina dhe Rusia në Këshillin e Sigurimit.