Presidenti francez, Emmanuel Macron, pritet të mbërrijë në Japoni këtë të martë për një vizitë zyrtare që fillimisht kishte në fokus forcimin e bashkëpunimit në energjinë bërthamore dhe inovacionin hapësinor, por që tashmë pritet të dominohet nga zhvillimet e luftës në Lindjen e Mesme.
Të mërkurën, Macron do të zhvillojë bisedime me kryeministren Sanae Takaichi, ku sipas Pallati Élysée, kriza në rajon do të jetë në qendër të diskutimeve. Dy liderët synojnë të shqyrtojnë mënyrat për të arritur zgjidhje të përbashkëta për situatën.
Ndërkohë, Japonia mbetet shumë e varur nga Lindja e Mesme për furnizimin me energji, duke siguruar rreth 95% të importeve të saj të naftës nga kjo zonë. Për shkak të rritjes së çmimeve të karburantit që nga nisja e konfliktit, vendi është detyruar të përdorë rezervat strategjike për të zbutur ndikimin ekonomik.
Në të njëjtën kohë, ministrat e ekonomisë dhe financave të vendeve të G7, ku bëjnë pjesë edhe Franca dhe Japonia, kanë deklaruar se janë të gatshëm të ndërmarrin “të gjitha masat e nevojshme” për të garantuar stabilitetin e tregjeve të energjisë përballë pasojave të luftës.