Presidenti amerikan Donald Trump tha se do t’ua përcjellë ankesat e tij për NATO-n anëtarëve të aleancës gjatë një takimi që do të mbahet më vonë të mërkurën.
“Do t’i paraqes problemet e mia”, tha Trump, duke folur krah sekretarit të përgjithshëm të NATO-s, Mark Rutte, ndërsa samiti po fillonte, raporton CNN.
Ai përmendi Grenlandën dhe Iranin si fusha shqetësimi, duke sugjeruar se SHBA-ja po paguan “miliarda dollarë më shumë seç duhet” për të garantuar sigurinë e Europës.
“Jemi trajtuar në mënyrë të padrejtë. Ne paguajmë në mënyrë disproporcionale”, tha Trump.
Ishte një fillim domethënës për këtë takim, i cili ka vënë zyrtarët europianë në ankth për mënyrën se si Trump do ta shndërrojë zemërimin e tij ndaj aleancës në ndryshime në pozicionimin ushtarak të SHBA-së.
Ndërkohë, anëtarët e NATO-s kanë qenë të prirur të theksojnë rritjet e tyre në shpenzimet për mbrojtjen para samitit. Më herët sot, Rutte përshëndeti rritjen e shpenzimeve për mbrojtjen nga vendet e tjera, duke thënë se 258 miliardë dollarët në shpenzime shtesë nga Kanadaja dhe Europa në vitet 2025 dhe 2026 ishin “marramendëse”.