Mbi 150 përfaqësues nga vendet e Ballkanit Perëndimor morën pjesë në Forumin e Barazisë Gjinore 2026, të mbajtur në Sarajevë, ku riafirmuan përkushtimin për forcimin e bashkëpunimit rajonal dhe avancimin e barazisë gjinore.
Në një njoftim të Ambasadës së Gjermanisë në Prishtinë thuhet se pjesëmarrësit përcollën mesazhin se barazia gjinore është thelbësore për ndërtimin e demokracive më të forta, shoqërive më rezistente dhe për të ardhmen e rajonit në Bashkimin Evropian.
Sipas ambasadës, një nga temat kryesore të forumit ishte avancimi i punës për hartimin e një deklarate të përbashkët të mekanizmave qeveritarë për barazi gjinore, me synim forcimin e bashkëpunimit rajonal në këtë fushë në të gjitha vendet e Ballkanit Perëndimor.
Në forum kontribuoi edhe përfaqësuesja nga Kosova, Vjollca Hoti, e cila, si police, theksoi rëndësinë e rolit të grave në udhëheqje për ndërtimin e sigurisë dhe bashkëpunimit të qëndrueshëm në rajon.
“Gratë po formësojnë një Ballkan Perëndimor më të sigurt përmes bashkëpunimit rajonal”, thuhet në postimin e Ambasadës së Gjermanisë.
Ambasada thekson se Gjermania mbështet Forumin e Barazisë Gjinore në kuadër të Procesit të Berlinit, duke nxitur bashkëpunimin rajonal dhe shndërrimin e dialogut në veprime konkrete.
“Të investosh në barazinë gjinore do të thotë të investosh në të ardhmen si të Ballkanit Perëndimor ashtu edhe të Evropës”, përfundon njoftimi.