Nuk ndalet vala e dhunës dhe e rrëmbimeve në pjesën veriore të vendit të Afrikës Perëndimore. Kryedioqeza katolike e Kafanchan-it konfirmoi rrëmbimin e një meshtari dhe vrasjen e tre personave.
Dhuna dhe rrëmbimet vazhdojnë pa u ndalur në veri të Nigerisë. Në tre ditët e fundit, të paktën 51 persona janë rrëmbyer dhe 6 janë vrarë gjatë sulmeve ndaj katër fshatrave në shtetin Kaduna, në pjesën jugore me shumicë të krishterë. Zona ishte goditur edhe në janar, kur mbi 180 persona u rrëmbyen dhe u liruan vetëm ditët e fundit.
Në zonën e qeverisjes lokale Kajuru, persona të armatosur rrëmbyen 11 njerëz, përfshirë një meshtar katolik, dhe vranë tre të tjerë. Arkidioqeza katolike e Kafanchan konfirmoi rrëmbimin e atë Nathaniel Asuwaye, famullitar i Kishës së Trinisë Shenjte në Karku. Sulmi ndodhi natën dhe u përshkrua si një akt terrorist.
Në një tjetër sulm aty pranë, u vranë tre persona dhe u rrëmbyen 38 të tjerë, mes tyre edhe një imam dhe katër anëtarë të bashkësisë së tij. Sulme dhe rrëmbime janë raportuar edhe në zona të tjera, ndërsa shtëpi janë djegur dhe shkatërruar. Asnjë grup nuk ka marrë përgjegjësinë për këto akte.
Këto ngjarje janë pjesë e një vale më të gjerë dhune që ka përfshirë edhe shtetet Katsina, Kwara dhe Benue, me dhjetëra viktima. Veçanërisht i rëndë ishte sulmi në fshatin Woro, në shtetin Kwara, ku u vranë 175 persona – sulmi më vdekjeprurës i këtij viti sipas Kryqit të Kuq nigerian.
Pas këtyre ngjarjeve, presidenti i Nigerisë, Bola Tinubu, ka forcuar masat e sigurisë duke dërguar trupa ushtarake. Autoritetet ia atribuojnë sulmet grupeve terroriste, përfshirë Boko Haram, duke theksuar se dhuna synon komunitetet që refuzojnë ideologjinë xhihadiste./Radio Vatikani