Partia Liberale e kryeministrit Mark Carney fitoi zgjedhjet federale të Kanadasë të hënën.
Pas mbylljes së qendrave të votimit, liberalët parashikohej të fitonin më shumë vende në parlament, sesa konservatorët. Megjithatë, nuk ishte menjëherë e qartë nëse ata do të fitonin një shumicë të plotë - të paktën 172 - apo do të duhej të mbështeteshin në njërën nga partitë më të vogla për të miratuar legjislacionin, raporton AP.
Liberalët dukeshin se po shkonin drejt një humbjeje dërrmuese, derisa presidenti amerikan filloi të sulmonte ekonominë e Kanadasë dhe të kërcënonte sovranitetin e saj, duke sugjeruar se ajo duhet të bëhej shteti i 51-të. Veprimet e Trump-it i zemëruan kanadezët dhe nxitën një rritje të nacionalizmit që i ndihmoi liberalët të ndryshonin rrëfimin zgjedhor dhe të fitonin një mandat të katërt radhazi në pushtet.
Rruga përpara për Kanadanë do të jetë sfiduese, paralajmëron kryeministri kanadez
Carney paralajmëron se sfidat me të cilat përballet vendi do të jenë të vështira, duke shtuar se ndryshimi i madh është gjithmonë shqetësues. Por ai thotë se ka besim në të gjithë Kanadanë.
"Meqenëse Kanadaja është më shumë se një komb, ne jemi dhe gjithmonë do të jemi një federatë," shton ai. "Nuk jemi gjithmonë të përsosur, por përpiqemi të jemi të mirë", raporton BBC
Ai thotë se forca e Kanadasë qëndron në unitet dhe në bashkëpunim.
"Ne përpiqemi të bëjmë gjëra, sepse janë të drejta, jo sepse janë të lehta," thotë ai.
Starmer premton lidhje më të forta mes Britanisë së Madhe me Kanadanë
Kryeministri i Mbretërisë së Bashkuar sapo i ka shprehur urimet e tij homologut të tij kanadez Mark Carney për fitoren e tij të fundit në zgjedhje.
Në një postim në X, Keir Starmer thotë se mezi pret të "forcojë lidhjet" me Kanadanë.
"Unë e mirëpres lidershipin tuaj në çështjet ndërkombëtare dhe e di që do të vazhdojmë të punojmë ngushtë në mbrojtje, siguri, tregti dhe investime", shton ai, duke iu drejtuar drejtpërdrejt Carney-t.
Zelensky duartroket Kanadanë për 'udhëheqjen parimore dhe 'mbështetjen e palëkundur'
Presidenti ukrainas, Volodymyr Zelensky, i dërgoi urimet e tij kryeministrit të Kanadasë, një vend me diasporën e dytë më të madhe ukrainase pas Rusisë.
Në një postim në X, ai thotë se "Ukraina i vlerëson thellësisht lidhjet tona të ngushta me Kanadanë dhe mbështetjen e palëkundur të popullit kanadez".
Zelensky shton se vendi i tij është mirënjohës për "udhëheqjen parimore" të Kanadasë në mbështetjen e Ukrainës që kur Rusia nisi pushtimin e saj në shkallë të plotë tre vjet më parë.
Udhëheqësi ukrainas përshëndet ndihmën ushtarake, financiare dhe humanitare, si dhe rolin e Kanadasë në vendosjen e sanksioneve kundër Rusisë.