Sot, në Klinë, kemi bërë zbulimin e shtatores së Presidenti Historik, Dr. Ibrahim Rugova, burrështetasit që me urtësi e vizion e bëri ëndrrën e Kosovës të dëgjohej në tërë botën.
Sot, Klina bëhet më e bukur.
Jo vetëm sepse po pasurohet me një vepër monumentale, por sepse po fiton një simbol të kujtesës, identitetit dhe vlerave mbi të cilat është ndërtuar shteti ynë.
Ky vend, që nga sot mban emrin Sheshi “Ibrahim Rugova”, nuk do të jetë vetëm një hapësirë publike. Ai do të jetë vend kujtese, reflektimi dhe edukimi qytetar.
Kjo shtatore që sot po përurohet është më shumë se një vepër artistike. Ajo është shenjë respekti dhe mirënjohjeje për një burrë shteti që në kohët më të vështira zgjodhi rrugën e mençurisë, dialogut dhe rezistencës paqësore.
Në emrin tim dhe të qytetarëve të Klinës, shpreh mirënjohje për donatorët, Marjan dhe Ilir Cubi, të cilët e mundësuan realizimin e kësaj shtatoreje, një kontribut me vlerë të veçantë për kujtesën tonë historike dhe për pasurimin e hapësirës publike të qytetit tonë.
I përjetshëm qoftë kujtimi për Presidentin Historik të Kosovës, Dr. Ibrahim Rugova!