Nacionalizmi serb në skenën e BE-së: Stabilitokracia në kurriz të Kosovës!
Nacionalizmi serb në skenën e BE-së: Stabilitokracia në kurriz të Kosovës! 17.11.2026 | 03:00
Nga Gurakuç Kuçi
 
Interpretimi i këngës nacionaliste serbe “Oj Kosovo, Kosovo” në hapjen e Forumit të Zgjerimit të BE-së në Bruksel i tejkalon kufijtë e një skandali kulturor, duke treguar se kjo është një çështje politike dhe e sigurisë që prek drejtpërdrejt kredibilitetin e Bashkimit Evropian dhe qasjen e tij ndaj Kosovës dhe Serbisë.
 
Kënga e vitit 1989, e shkruar dhe e publikuar në kohën e mobilizimit nacional-shovinist serb, përmban pretendime të hapura territoriale ndaj Kosovës. Pikërisht kjo lloj narrative historike dhe politike është përdorur për të justifikuar politikat gjenocidale të Serbisë ndaj Kosovës.
 
Si është e mundur që Bashkimi Evropian, i cili financon programe për luftimin e diskriminimit dhe gjuhës së urrejtjes, si dhe për promovimin e tolerancës dhe pajtimit rajonal, të lejojë promovimin e një narrative të tillë në një aktivitet të vetin institucional? Madje, BE-ja financon edhe në Kosovë projekte konkrete kundër diskriminimit dhe urrejtjes. Kundërthënia bëhet edhe më e rëndë kur kjo ndodh në Forumin e Zgjerimit, ku diskutohet e ardhmja evropiane e rajonit, ndërsa Kosova nuk figuron me përfaqësim qeveritar në programin e nivelit të lartë.
 
Kjo ngjarje nuk mund të lexohet e shkëputur nga politika e stabilitokracisë që BE-ja ka ndjekur prej vitesh ndaj Serbisë së Vuçiqit, duke i dhënë përparësi stabilitetit afatshkurtër në vend të përballjes me politikat destabilizuese të Beogradit. Mesazhi që përcjell një skenë e tillë në zemër të Brukselit është shqetësues, pasi pretendimet territoriale serbe gjejnë hapësirë edhe në aktivitetet evropiane, ndërsa akomodimi politik i Serbisë vazhdon të trajtohet si instrument për ruajtjen e stabilitetit rajonal.
 
Kjo qasje ka kosto reale për sigurinë. Tolerimi i narrativave territoriale krijon kushte për normalizimin e tyre, dobëson përpjekjet për pajtim dhe rrezikon ta shndërrojë zgjerimin evropian në një mekanizëm për akomodimin e kërkesave politike të Beogradit, në vend të një procesi të bazuar në rregulla dhe detyrime të barabarta.
 
Për më tepër, vetë BE-ja është ndërmjetëse e Marrëveshjes së vitit 2023, e cila përfshin respektimin e integritetit territorial, barazinë dhe marrëdhëniet e mira fqinjësore. Nuk mund të kërkohet zbatimi i këtyre parimeve në tryezën e dialogut, ndërkohë që në aktivitetet e Komisionit Evropian u jepet hapësirë mesazheve që bien ndesh me to.
 
Komisionarja Marta Kos duhet të distancohet publikisht, të kërkojë falje për shfaqjen e kësaj kënge në aktivitetin e Komisionit Evropian dhe të japë shpjegime se kush e ka miratuar një repertor të tillë.
 
Bashkimi Evropian duhet të tregojë qartë nëse zgjerimi mbetet një proces i mbështetur në sundimin e ligjit, sigurinë dhe respektimin e integritetit territorial, apo nëse logjika e stabilitokracisë vazhdon të përcaktojë marrëdhëniet me Serbinë, duke cenuar besueshmërinë e politikës evropiane ndaj Kosovës.
 
Pajtimi që toleron pretendimet territoriale nuk ndërton paqe të qëndrueshme, por krijon kushte për kriza të reja./Bota Sot
Biskota me çokollatë dhe avokado – Ëmbëlsira e shëndetshme Avokado mund të jetë një zëvendësues i shkëlqyeshëm i vajit ose i gjalpit, për ta bërë këtë mjafton
Recetë: Brokoli me gjizë e hudhra, shumë e shëndetshme Kjo është një recetë e thjeshtë, shumë fantastike dhe e pasur në vlera ushqyese. Përgatitet me
Maska që tërheqë fytyrën më mirë se botoksi Nuk keni nevojë të humbni shumë para për t’u dukur më të rinj!
Smoothie nga limoni dhe jogurti për dobësim dhe metabolizëm të shpejtë Nëse dëshironi të hiqni shpejt dhe shëndetshëm kilogramët nga kofshët dhe stomaku, atëherë ky
Palëpeta gjermane: Brumi më i shijshëm, por më i mira është që mund të jetë i njelmët dhe i ëmbël! Jemi të sigurt që do të kënaqeni në gatimin interesant dhe në shijen e parezistueshme të palëpetave