Me rritjen e temperaturave në të gjithë Evropën, drejtori i OBSH-së për Evropën, Hans Kluge, u ka bërë thirrje qeverive që të njohin të nxehtin ekstrem si një krizë shëndetësore dhe të forcojnë përgatitjen e sistemeve shëndetësore.
Vala e të nxehtit, e cila ka marrë mijëra jetë në Evropë, ka treguar nevojën që sistemet shëndetësore të përgatiten më mirë për temperaturat ekstreme
” Ndërsa temperaturat kanë kaluar 40°C në disa pjesë të kontinentit, thirrjet emergjente janë rritur, spitalet kanë trajtuar më shumë pacientë me sëmundje të lidhura me nxehtësinë, ndërsa të moshuarit dhe personat me sëmundje kronike janë përballur me rreziqe më të larta.
“Njohni të nxehtin ekstrem si një krizë shëndetësore dhe veproni para se temperaturat të arrijnë kulmin,” shkroi Kluge në një postim në X.
“Përgatitja për nxehtësinë duhet të jetë funksionale: lirimi i shtretërve, mbrojtja e pacientëve me rrezik të lartë, sigurimi i ftohjes, kontrolli i energjisë rezervë dhe mbështetja e punonjësve shëndetësorë,” shtoi ai.
Nxehtësia tashmë ka vënë nën presion shërbimet shëndetësore në disa vende. Në Francë, urgjencat kanë raportuar një rritje katërfish të rasteve të lidhura me nxehtësinë, si goditje nga nxehtësia, dehidratim dhe hiponatremi.
Në Mbretërinë e Bashkuar, Shërbimi i Ambulancës së Londrës tha se nxehtësia ekstreme kontribuoi në ditën më të ngarkuar në historinë e tij, duke iu përgjigjur 8,869 thirrjeve emergjente të premten e kaluar.
Disa spitale të NHS-së gjithashtu shpallën gjendje kritike pas prishjeve në sistemet e ftohjes që dëmtuan pajisjet mjekësore, sallat e operacionit dhe pavijonet, duke shtuar presion mbi shërbimet që tashmë po përballeshin me raste të goditjes nga nxehtësia, dehidratimit dhe pacientëve të moshuar të rrezikuar.